Hartelijk dank voor u like, dit is een ode aan de acteur
Belia, Brombeer, beun'aes...
"Wel, wel Belia, wat lôp je te sjouwe kind.
't lik wel of je 'n 'ûs'ouwe 'êt met tien kindere.
Dà'-kenne jûlie mè'-z'n twieje toch iet allemael opete!"
"Im, 'ou je stil.
Jan zit bij 'n annemer, daer mot-tie werreke as 'n ploegpaerd, zô moe as 'n 'ond komp-tie 's-aeves naer 'ûs, eet as 'n wollef en daernae slaep-tie as 'n os.
Kik-is Im, daer wul ik iet over staen miere, ik ben netuurlek veuls te blij dat Jan an de slag kos; je ben toch 'n goudfezant teugewoordig as je werrek 'eb.
Z'n baes is wel 'n brombeer, mar goed voor de cente.
Z'n vrouw is 'n 'aai, ochendziek; met 'n slakkegang komp-ze de koffie brenge en dan kikt ze as 'n oorwurrem, mar daer 'êt Jan vorders 'iet mee ût te staen.
Wel met-tie twie man, die ôk bij d'm werreke.
Jan zee onlangs: ' Die staene d'r bij as twie krêtezels, d'r 'è-je niks an.'
Kik Im, Jan kos ôk bij 'n beun'aes terecht, mar dà'-wulde die iet.
Neen 'ij kikt liever de kat ût te bôm.
Mar non mot-tie wel 'ard werreke 'oor, ik zee gisteraevend nog teuge d'm: "Jan", zee ik, " je ben toch 'n eendvogel om voor drie man te sjouwe, 't is bij de kenêne of.
Dan kik tie zô trou'artig naer me met 'n paer 'erte-ôge, dà'k mar gauw over koetjies en kallefies met t'm gae kalle.
Aars zit je zonder erreg as twie kemp'aene teuge'over mekander te muggezifte."
"Neen, Belia, daer 'è-je niks an, mar dà'-je-of en toe je 'art wul luchte, dank je de koekoek.
Mar je weet iet 'oe ôit 'n koe 'n 'aes vangt en die twie krêtezels, waer je 't zô net over 'a'.....
je mot mar zô denke: "n kallef ben je ien jaer, mar 'n ezel blêf je 'êl je leve."
"Je-'êt gelik, Im.
Jan is zô mak as 'n lam, 't is 'n goed braef mens."
'è.., 'è.., Belia ken in d'r Jan toch nog 'n mens zien.
Gelukkig mar.
Nadruk verboden Immetje
Geplaatst op 14-05-2008 en 1475 keer gelezen
Like dit 830 Liked