Hartelijk dank voor u like, dit is een ode aan de acteur
Zô mar 'n praetje. Bij de groenteboer
Wat mozze we as kind toch êgelek vaek om bô'schoppe.
As je in 'ûs kwam van school, dan was 't: " Lôp effe naer Verbaen en 'ael drie maetjies bakôlie."
"Mot tat non?", vroog je dan; je wis 't antwoord al.
"Ja, dà'-mot non, 'ier 'è-je geld en 'n fles", en daer ging je.
Of 't was: "Lôp effe naer onder an de dik en 'ael bij Ros ien ons jonge kaes."
"Ken dat iet op 't 'ookje, daer 'ebbe ze toch ôk kaes", prebeerde je, maer nien 'oor, je mos naer Ros, die 'a' goeie kaes.
Zô mos 'k op 'n kêr naer de groenteboer ien kilo andêvie en ien pond uie 'aele.
Ik maer lôpe onderweg: "ien kilo andêvie en ien pond uie…..ien kilo andêvie en ien pond uie…"
In de winkel stonge êl wat mense, dus 'k was voorlôpig nog iet an de beurt.
As 'k non maer iet vergeet, wà'k 'ebbe mot……ien kilo andêvie,ien pond uie.
Naes'-me 'oorde 'k 'n vrouw in d'r êge praete: "Rôie kôl mè'-speklappies, rôie kôl met 'n balletje ge'ak, rôie kôl met 'n 'amlapje, rôie kôl met ût'ebakke spek, rôie kôl met 'asjee, rôie kôl met appeltjies, rôie kôl mè'-rolpens……", ammaer weer rôie kôl met……!
"Zeg 't maer, buurvrouw", zee de groenteman teuge d'r.
"Ien grôte knorraep, aars twie klêne…….….(?)", zee ze êl vlug, net of ze schrok.
Daernae vroog te groenteboer an mên, wà'k mos 'ebbe.
'k zee: " Rôie kôl met uie……"
" 'Oeveul", wier me 'evraegd.
'k wis iet mêr 'oeveul.
"Gae maer effe an je moeder vraege", opperde de groenteboer en ik naer 'ûs.
"Moe. wà'-mot 'k non ôk weer 'ebbe?", vroog 'k.
"Mêd", zee me moeder, "twie bô'schoppe, is tat non zô veul?"
Maer 'k was te klus kwêt.
"Schrêf maer effe op 'n briefje, dan ken 'k iet 't verkêrde meebrenge".
Me moeder dee-'t en toe'-ze 't me gaf, zee ze: "As je zô wênig ken ont'ouwe, mot 'k nog zien of je dut jaer wel over gaet op school."
"………Zô wênig ont'ouwe……...?
Rôie kôl mè'-speklappies, rôie kôl met 'n balletje ge'ak, rôie kôl met 'n 'amlapje, rôie kôl met ût'ebakke spek, rôie kôl met 'asjee, rôie kôl met appeltjies, rôie kôl met rolpens…..",dreunde ik op.
En ût m'êge wis 'k 'r ôk nog ien: " Rôie kôl mè'-krente."
Non gaen 'k maer-is denke wà'k vandaeg gae ete.
't beste 'oor.
Nadruk verboden Immetje
Geplaatst op 04-01-2004 en 1426 keer gelezen
Like dit 795 Liked